பதநீர் 6

பதநீர்  6

உயரத்தில் வேலை செய்தும்
தரை(யில்) மனிதருக்கு
அவர் உயர்வு தெரிவதில்லை

மரத்தைப் பழக்கி
பால் கறக்கும்
பனைத் தொழிலாளி
இவர்கள்

காளைக்கு மூக்கணாங் கயிறு
குதிரைக்கு கடிவாளம்
யானைக்கு அங்குசம்-இவை
மனிதர் அடக்கி ஆள

பனையைப் பிடித்தபடி  அடக்க
கடிப்பு

கடிப்புகள் மூன்று விதம்
கட்டுப் பாளைக்கு ஒரு முழம் என்றால்
அலவிரல் பனைக்கு ஒன்றரை
முழ நீளம்-கடிப்பு

கட்டுப் பாளையில் பால்
சுரக்க ஒரு முகம்
அலவிரல் பனைக்கோ
ஒவ்வொரு விரலிலும்
தனிமுகம்

பாளை வெடித்து
அலவிரல் விட்டால்
ஒரு பாளைக்கு
இருபது முதல்
இருபத்தி நான்கு வரை
அலவு வரலாம்

மூன்றோ ஆறோ
அலவுகளை நுழைத்து
ஒரு கலயம் கட்டலாம்

பதநீர் விழும்
வேகத்துக்குத்தக்க
கலயம் நிர்ணயிக்கப் படும்

கட்டுப்பாளை
மூன்று மாதங்கள்
பால் தந்தால்
அலவிரல்கள்
ஆறு மாதங்கள் சுரக்கும்

சுரக்கும் மட்டும் பால்
இறக்கப்படும்
பனைத் தொழிலுக்கு
எல்லாம்
அளவோடு வேண்டும்
பாளை அலவிரல் இடுக்க
ஏற்ற பருவம்
அனுபவக் கண்களால்
அளந்தெடுக்கப்படும்
பலனைக் கொண்டே
பனைமொழி புரியும்
அளவுக் கணிப்பை
மாற்றிக் கொள்ள
அனுபவமே பாடமாகும்
கண் அளக்காததையா
கை அளந்துவிடப் போகிறது ?


பனைக்குப்பனை
மாறுபடலாம்
இடுக்கல் முறை
அனுபமே ஆசான் !
பழக்கப்பட்ட கைக்கு
எல்லாம்
அடங்கிப் போகும்
சுவைப்போம்
அவர் அனுபவத்தால்
அலவுப் பதநீர்
யாவரும் !