பதநீர் -12

பதநீர்-12
--------
பழம் பனை
புதுப் பாளை
நீட்டுது

சில்லாட்டைப் பிடியில்
மட்டைக்கு இடையில் .

மண்ணில் கால்
விண்ணில் தலை

ஆழத்தில் வேர்
நீளத்தில் நீர் .

ஒற்றைப் பனை
ரெட்டைப் பனை
வரிசைப் பனை
கும்பல் பனை

மேடா பள்ளமா
காடா கரையா ?
கவலையே இல்லை !

குட்டைப் பனை
நெட்டைப் பனை
சாய்ந்த பனை
நிமிர்ந்த பனை
அனேகம்
நட்டதில்லை !

ஓர் ஆண்டுக்கு
ஒரு தரமே வரும்
பாளைப் பருவ காலம்

வித்தகக் கை
தொட்டுத் தட்டிக்
கொட்டித் திருத்த

ஈரம் ஊறும் திறம்
பெறும் பாளை

திரண்டு உருண்டு
விழும் புது நீர்
அது
பதநீர் !

புல் இனம் பனை
நடுத் தண்டுள்
வெண் பஞ்சுச் சோறு
அங்கே தேங்கும் சாறு

எங்கிருக்கோ பதநீர் ?

ஊற்றில்லை
உடைப்பில்லை
வரம்

மரம் மனிதர்
பட்ட காயம்
கொட்டும் உள்ளிருந்தே
ஆற்றும் திரவம் !

வேம்பு பிசின்
கள்ளி பால்
மனிதர் ரத்தம்
பனை நீர்

விரைந்து சுரந்து
உறைந்து வந்த
மருந்து .

பாளை இடுக்கி நசுக்கி
பதநீர் கசியும் வரை
பக்குவ மாக்கும்
பண்பட்ட
தொழில் நுட்பம்

பதநீரைச் சிறைப் படுத்தி
பக்குவ மாக்கிக் காக்கும்
கலசம் !

கசி துவாரக்
கதவடைத்துப் பூட்ட
முயலும் இயற்கை

தடுக்கும் பணி
தொடுக்கும் தொழிலாளி
காலை மாலை
பாளை சீவும்
போராட்டம் !

சீவல் கூடிப் போனால்
குறையும் பதநீர் காலம்
சவரக் கூர்
அரிவாள்
சருகாய்ச் சீவி
நீண்டு போகும் ஆயுள்

பாளைத் துளிகள்
கலசத்துள்
சரண்டையும் வரை

பதநீர் ஆட்சி நீட்சி !